بسم الله الرحمن الرحيم
وبه نستعين
أول ما دخلت الكلية وأنا عندي 17 سنة
مكنتش لسة فوقت من العته بتاع ثانوي
وصراحة كنت شايفة إنها فرصة إني أحب بقى وكدة
بس اللي كنت أعرفه عن الحب إنه بيجي من أول خبطة
يعني ديماً البطل والبطلة يتخبطوا في بعض
السكتشات توقع والنضارات
وهوبا يحبوا بعض
كنت مستنية الفرصة تجي لي في خبطة أتخبطها صدفة
بس بعد ما قعدت 3 سنين في الكلية
متخبطش فيهم غير مرتين
مرة في الأسانسير دوخت فدوست على رجل اللي واقف جنبي
:D
ومرة تانية واحد كان بيخلع البالطو واحنا طالعين من السكشن
فرزعني حتة لكامية في وشي بس لكامية ايه كانت عنب
:DDD
فهمت إن الحب عمره ما كان كدة
الحب بيجي بالراحة وبهدوء
ومن ناس مكناش نتخيل إننا كان ممكن نقابلهم أو حتى ممكن نحبهم
هو أنا صحيح برضه لسة محبتش بالطريقة التانية :D
بس أنا بقى معنديش استعداد أفقد عين أو عاهة مستديمة
في خبطة جديدة
:))))
هي التدوينة خلصت بس الكلام ماخلصش
ياريت المخطوبين والمتزوجين
يبعتوا لنا خبطاتهم في الحب
مش مجرد تسالي يعني
أو حب استطلاع
علشان بس نرجع نصدق إنه موجود
وإنه نبيل وكريم معانا
وممكن بجد يغير حياتنا ويغيرنا للأبد
من تجارب لناس انتهت بارتباط رسمي قدام الناس
وارتباط أبدي في الحياة
:)
